Fjord1 overtar Lavik-Oppedal
Fjord 1 AS er tildelt kontrakten for drift av riksvegferjesambandet E39 Lavik-Oppedal for perioden 2026-2034.
Det kommer fram i ei pressemelding frå Statens Vegvesen.
Fjord1 vart tildelt anbodet fordi rederiet hadde den beste kombinasjonen av pris og kvalitet i sitt tilbod. I tildelinga vart prisen vekta med 60 prosent, automatisering med 30 prosent og gjennomføringsevne med 10 prosent.
Kontrakten gjeld for perioden 01.09.2026-31.08.2034, med moglegheit for forlenging i inntil tre år.
Sambandet skal driftast med fire nye nullutsleppsfartøy på 120 PBE (personbileiningar) og vil få 15 minutts frekvens på kvardagar og søndagar. Dette er ei forbetring samanlikna med i dag, kor det er tre fartøy og 20 minutts frekvens.
Tilboda vart rangert på følgande måte:
| Rangering | Tilbydar | Total poengsum | Tilbodspris |
| 1 | Fjord 1 AS | 95,89 | 2.754.309.658 |
| 2 | Torghatten Midt AS | 89,71 | 3.180.174.664 |
| 3 | Norled AS | 61,72 | 4.139.304.064 |
Auka automatisering
Kontrakten inkluderer utvikling av automatiserte løysingar for alle dei fire fartøya frå og med 2027 og ut perioden.
Prosjektet vert rekna som eit nytt steg i retning av auka automatisering innan maritim sektor. Overføringsverdi til andre delar av sjøfartsnæringa kan på sikt vera stor.
