Dei tre leiarane smilte frå øyre til øyre under signeringa.
Foto: Anders Huke
Signerte intensjonsavtale under Nor-Shipping
Norled, Remota AS og SEAM As signerte torsdag ein intensjonsavtale. Dei skal no samarbeida om vidareutvikling av drift av eit kontrollsenter for marine operasjonar og autonome operasjonar av skip.
- Synergiar er viktig for oss. Kompetansen SEAM og Remota har, har ikkje me. Så me er avhengig av å samarbeida for å få trygge, gode og kostnadseffektive løysingar. Det er vår motivasjon for dette, sa CTO i Norled, Erlend Hovland til Skipsrevyen like etter dei tre leiarane hadde signert ein serviett.
Remota er eit fellesforetak etablert av DeepOcean, Solstad Offshore og Østensjø Group, som skal setja fart på bruk av fjernstyrte tenester for å redusera driftskostnader og utslepp for maritim- og offshorenæringar.
- For oss som jobbar med fjernstyringssenter og operasjonar frå land, er det å jobba med store hurtigbåt og ferjeaktørar, som er veldig innovative, og saman med SEAM, som er leiande på sin teknologi, gjera at me akselererar vårt tilbod til det maritime aspektet med fjernstyring, fjernovervaking og fjernrettleiing av båtar, seier administrerande direktør i Remota, Sveinung Soma til Skipsrevyen.
