Auka omsetning og stabil lønnsemd

Verftet gjennomførte i alt 21 dokkingsoppdrag og totalt 32 oppdrag gjennom året, skriv selskapet i ei pressemelding.

Myklebust har ei ordrebok som tel fem fartøy der verftet skal bygge to hydrogenferjer til Torghatten Nord, to konstruksjonsfartøy til Rem Offshore. I tillegg skal verftet bygge ein pelagisk trålar til Sunbeam Ltd. Nybyggingsordrane totalt sett gir føreseielege utsikter og sikrar verftet ein horisont som strekker seg til sommaren 2027. 

– Vi har ei auke i nybyggingsaktiviteten som også viser igjen på omsetninga for fjoråret. I tillegg har vi styrka både infrastrukturen og bemanninga, med blant anna 40 nytilsette sidan starten av 2024. Her er vi framleis i ei tilsettingsfase med behov for fleire folk, seier dagleg leiar Leiv Sindre Muren. 

I 2024 hadde Myklebust Verft ei omsetning på 817 mill. kroner. Driftsresultatet enda på 21 mill. kroner, med eit årsresultat før skatt på 17 mill. kroner. Konsernrekneskapen i 2024 for Myklebust Verft Invest viser ei omsetning på 817 mill. kroner og eit resultat på 18 mill. kroner før skatt. 

Meir plass og 110-årsjubileum 

Parallelt med mange ettermarknadsoppdrag og kommande nybyggingsoppdrag har Myklebust dei siste månadane forberedt verftet for meir aktivitet, med mellom anna arealutviding. Dette er eit ledd i å styrke infrastrukturen og kapasiteten på verftet og vil totalt gi ca. 20 % større areal. 

I august var det jubileumsfeiring med 110 års markering og opent verft med over 600 besøkjande. 

– Myklebust Verft feirar 110 år med gode føresetnader for framtida, med ein ordrehorisont og pågåande anleggsutvikling som gjer at vi står godt rusta til å ta verftet vidare inn i framtida, seier Muren.