Elise har kontra både dårlege haldningar og sjøsykja: – Du kan bli kvitt det

Utdanninga tok ho på skuleskipet «Gann», ei utdanning som ifølgje ho har vore fyllt med gode opplevingar. Ho har no matros- og motormannsfagbrev.

Likevel har det ikkje berre vore oppturar for 21-åringen frå Karmøy. Allereie på den første båten ho var på, vart ho møtt med utfordrande haldningar.

– Det var det litt blanda stemning om det å ha damer om bord. Som heilt fersk lærling, med eit glansbilete av sjøen, var det at folk kjefta og meinte eg skulle vaska var eit kultursjokk. Eg ynskte ikkje å vera der. Heldigvis er far min sjømann, og han lot meg ikkje gje opp. Eg bytte båt, og etter det har det vore det kjekkaste eg har drive med i livet mitt.