Frå sild til supply og vidare til konkurs - no skal Dof på børs att

Dof var skipa i 1981 i Austevoll, ein kommune sør for Bergen. Selskapet har gjennom tida utvikla seg til eit globalt selskap med båtar innanfor dei fleste felt i offshore olje og gass, og i seinare tid også havvind. 

Dei har soleis markert seg over heile verda, men det har ikkje berre vore oppgangstider for selskapet. Noko konkursen i februar stadfestar.

Då dei starta var målsetjinga å gjera offshoreindustrien til ein ny distriktsnæring. Eit stort og breitt geografisk samarbeid skulle ta sild til supply, og i 1981 kom difor etableringa av selskapet District Offshore, eller Dof. Fiskebåtreiarane, Fiskernes Bank og kommunen stod bak invitasjonen, og godt hundre aksjonærar frå heile vestlandet slutta seg til det nye prosjektet.