Fjord1 vinn ferjeanbod i Hordaland

Etter ein anbodskonkurranse vart Fjord1 Fylkesbaatane tildelt løyve for drifta av Bruravik-Brimnes sambandet av Vegdirektoratet.
Selskapet skal drifte sambandet med tilsvarande kapasitet og rutetilbod som i dag fram til Hardangerbrua opnar sommaren 2013 og erstattar dagens ferjesamband over Eidfjorden mellom Bruravik og Brimnes i Hardanger.
Administrerande direktør i Fjord1 Fylkesbaatane Stig Kristoffersen er godt nøgd med resultatet.
- Vi er sjølvsagt svært glade for å vinne anbodet, og ser fram til å frakte reisande på Bruravik-Bremnes sambandet i 2011, seier Stig Kristoffersen.
Dette vert det tredje sambandet Fjord1 skal drifte i Hordaland, og Kristoffersen meinar dette lovar bra for rekruttering og rullering av mannskap i området.
- Med drift av også dette sambandet, vil det være ein stor fordel for både tilsette og selskap at vi har fleire medarbeidarar i denne regionen.
Han viser vidare til at nye reglar om verksemdsoverdraging i yrkestransportlova også er med på å trygge arbeidsplassar der nytt selskap tek over drift av ferjesamband.
- I den nye lovendringa er arbeidstakarane sikra same rettar ved anbodsoverdraging som ved overdraging av verksemd, og det gjer at ein sikrar tryggare arbeidsplassar. Tilsette på sambandet i dag vil difor få tilbod om å fortsetje, seier Kristoffersen.