Tek levering av ny hybrid arbeidsbåt
Tronds Marine Service har no teke levering av den nye hybride arbeidsbåten «Tronds Hans H».
Fartøyet er bygd ved verft i Polen og designa av ProGreen på Fitjar.
Båten er 28,7 meter lang og utstyrt med ein batteripakke på 1 432 kWh, som legg til rette for effektiv og meir miljøvenleg drift.
– Vi er stolte over å få tilliten til å drifta og bemanna eit heilt nytt hybridfartøy. Dette styrkjer både kompetansen vår og satsinga på ny teknologi, seier administrerande direktør Kjartan Mehammer i Tronds Marine Service.
Selskapet har ansvar for både teknisk drift og mannskap.
Bemanninga om bord er sett saman av seks personar: kaptein, dekkssjef, maskinpassar, to matrosar og ein lærling. Dette bidreg til viktige lokale arbeidsplassar og vidare kompetansebygging i Høylandsbygd.
«Tronds Hans H» skal leigast ut til oppdrettsselskapet Alsaker Fjordbruk AS kor den i all hovudsak skal gå i operativ drift langs vestlandskysten.
