Verdens største gassferje

Verdas største gassferje

Fjord1 og Fiskerstrand BLRT har inngått avtale om prosjektering og bygging av verdas største gassferje. Ferja vert levert 30. november 2011 og sett inn på Boknafjorden i sambandet Arsvågen – Mortavika i Rogaland – og skal i tillegg fungere som reservefartøy på Halhjem-Sandvikvåg sambandet i Hordaland. Trafikken i desse ferjesambanda har auka svært mykje sidan Fjord1 tok over driftsansvaret i januar 2007.

Den nye gassdrivne ferja er designa av Multi Maritime AS i Førde og får ein total lengde på 129,9m, ei største bredde på 19,2m og ein kapasitet på 242 personbilar og/eller 22 vogntog i kombinasjon med personbilar.

– Det er svært hyggeleg å vinne ein slik hard anbodskonkurranse og vite at vi er konkurransedyktige i høve andre europeiske verft, seier adm. dir. i Fiskerstrand BLRT, Rolf Fiskerstrand.

Det er plass til 600 passasjerar inkl. mannskap og fergen en skal byggast iht. Det Norske Veritas sin klasse +1A1, Car ferry A, gas fuelled, Clean, RPS, EO, R3 (NOR) med dødvekt på vel 1300 tonn og vel 7000 BT. Ferja vert utrusta med 4 azimuth thrustere som drivast av et gass-elektrisk anlegg beståande av 3 store LNG gass motorar og vekselstrømgeneratorar. Gassmotorane vil gje ein servicefart på ca. 20 knop.

Konsernsjef i Fjord1, Leif Øverland påpeikar at den nye ferja vil gi en ny kvardag for brukarane av sambandet. – Dette er ein gledens dag for trafikantane. Med denne tredje ferja i operasjon på Boknafjorden sikrar vi 20-minuttsavgangar – samanlikna med kvar halvtime som er dagens løysing.

Godt over to millionar privatbilar og godsbilar brukte sambanda i 2009, og utan den nye ferja ville køane blitt uhaldbare i tida framover. Sambanda Arsvågen-Mortavika og Halhjem-Sandvikvåg er to av dei tre mest trafikkerte strekningane i landet, med 3,9 millionar PBE i 2009. Ved planlagde verkstadopphald og driftsproblem elles skal ferja også vere reservefartøy for Bjørnefjorden. Sambanda vil då gå etter rutetabell som gjeld i dag.

Øverland viste til at dette er også er ein stor dag for miljøet, ettersom dei naturgassdrivne ferjene er svært miljøvenlege med redusert NOX utslepp på om lag 90%. – Det at styresmaktene har sterkt fokus på miljøvenlege former for energibruk i anbodssamanheng er svært gledeleg, seier Leif Øverland, konsernsjef i Fjord1.

Fjord1, som sette i drift verdas første gassferje Glutra i Møre og Romsdal i 2000, er framleis åleine i marknaden på drift av bilførande gassferjer. Ferjesambanda på Kyststamvegen i Rogaland og Hordaland har sidan 2007 blitt trafikkert av fem slike ferjer frå Fjord1. Denne tredje ferja på Arsvågen-Mortavika – som også skal avlaste Halhjem-Sandvikvåg – vert såleis den sjette gassferja i dette området. Fjord1 vil i løpet av 2011 ha 12 gassferjer i drift langs norskekysten – som gjer selskapet leiande i verda.